Laura Wallnöfer es creschida sü per granda part a Bever (CH). Zieva absolt il seminari da magistra a Cuira (1999 – 2004) supiglia ella dal 2004 üna plazza scu magistra illa scoula a Segl, daspö il 2016 eir auncha la funcziun da mnedra. Wallnöfer ho üna granda paschiun per chanter e passainta eir bgeras uras improvisand al clavazin. A Segl ho la magistra fundo il COR VIVA (2007), ün ensemble cun vuschs masdedas dad homens e duonnas ed ün an zieva las VIVA VOICE (2008), ün ensemble da duonnas. La magistra fo eir gugent sport aint il liber, passlung, ir in muntagna. La dirigenta es marideda, ho duos iffaunts da 14 ed 11 ans chi chauntan eir gugent.

Dr. Barbara Studer, neuroscienzieda, es confundatura e CEO da Hirncaoch SA.
La neuroscienzeda promovida lavura illa perscrutaziun, ill’instrucziun ed illa pratcha. Zieva avair s-chaffieu e mno ün post specialiso a l’Universited da Berna ho ella fundo il Spin-off-coach dal tscharvè, cun il quêl ella e sieu team spordschan programs cumplessivs per la fitness mentela e la sandet per giuvenils fin persunas pü attempedas. Ella es marideda, mamma da trais iffaunts ed es eir d’inscuntrer scu referenta e musicista.

Clara Sattler, oriunda dal Tirol dal Süd (I), ho absolt sieu stüdis da chaunt per chanzun, oratori ed opera a Bulsaun ed a Vienna. Ultra da que ho ella absolt furmaziuns da maister tar Maria Venuti, Ann Monoyos, Kurt Widmer e Helga Müller Molinari.
L’experta per furmaziun da vusch es fich dumandeda. Ella pratichescha üna viva activited da concerts in Italia, in Svizra ed a l’exteriur. Sieu repertori taundscha dal chaunt baroc fin al chaunt modern.
Ella as ho preschenteda già in grandas chesa da concerts, aint il chastè da Schönbrunn a Vienna, i’l Stephaniensaal a Graz, a Grein al Danubi (operas dal baroc), in Pologna (Carmina Burana), a Mostar e Sarajevo, aint il Dom da Milaun, a Salzburg Lodi ed a Roma. Cul cor viril ‘Götzis’ ho ella mno dal 2008 üna turnea tres l’Africa dal Süd, dal 2014 in America dal Süd. Scu commembra da l’ensemble d’operettas dal Tirol dal Süd ho ella chanto la princessa i’l ‘Vogelhändler’, Laura i’l ‘Bettelstudent’, Rosalinde illa ‘Fledermaus’, Hanna Glawari illa ‘Lustige Witwe’ e la contessa Mariza.
Actuelmaing instruescha Clara Sattler a la scoula da musica da l’Engiadin’Ota. Ella dirigia il cor viril ‘Brummnet’, il cor da mattas ‘Vinzentiner’ ed il Cor masdo da Zuoz.

Gernot Niederfriniger (nat dal 1974) es magister da musica, referent, dirigent da cors, cumponist, musicist da baselgia e musicant. Daspö la scolaziun al conservatori tirolais ad Innsbruck i‘ls rams zitra e flöta da lain cun qualificaziun d’instruir dal 1995 instruescha el a la scoula da musica Vnuost Sura, es mneder dal ‚Vinschger Chor‘ e commember in diversas gruppas da musica populera. El lavura scu referent e mneder tar seminaris da musica populera e presidiescha daspö il 2014 l’uniun da musica populera dal Tirol dal Süd.

Fingià düraunt si’infanzia ho Nina Mayer chanto aint il cor d’iffaunts ad Oberau/Garmisch-Partenkirchen (D). A partir da quatter ans ho ella giodieu las prümas uras da violina, cun tschinch ans es gnida tiers la flöta da lain e cun set ans ho ella survgnieu instrucziun da clavazin. Ella es steda commembra da l’orchester d’iffaunts da Werdenfelser ed ho frequento il gimnasi benedictin Ettal (D). Scu matta giuvna chantaiva ella i’l cor, sunaiva aint il orchester, eir aint il orchester da flötas. Zieva as ho ella preschanteda scu chantadura in üna Big Band. Cun 14 ans ho ella fundo la band Tubestar, lo as ho ella preschanteda scu chantadura e violinista. Insembel cun sieus amihs da la band haun els scrit egnas chanzuns, els haun do bgers concerts. L’an 2001 ho Tubestar survgnieu il premi da l’Abat Placi per l’ingaschamaint culturel. Nina Mayer ho piglio inavaunt instrucziun da chaunt da jazz e pop, pü tard eir da bratscha. A segua ün stüdi privat da chaunt tar la chantadura Helena Jungwirth da Planegg/München (D). Ella es gnida tschernida scu magistra da violina e clavazin in l’internat Ettal. Lura as ho ella decisa da fer il stüdi scu magistra da musica al gimnasi a la Scol’ota da musica e teater a München (ram principel clavazin, ram laterel violina, ram d’accent chaunt). Dal 2005 es Nina Mayer gnida a ster in Svizra. A Ramosch lavura ella hoz scu magistra privata da chaunt, clavazin e violina. I’l cor da vschinauncha ho ella chanto divers ans. Zieva ho ella surpiglio la bachetta dal cor masdo da Ramosch. Daspö il 2006 instruescha ella scu magistra da chaunt a la scoula da musica Engiadina Bassa/Val Müstair. Cumpuoner egnas chanzuns rumauntschas e chanzuns per iffaunts tuocha tar sias lavuors predilettas. Daspö il 2014 maina ella cors d’iffaunts e da giuvenils in Engiadina Bassa. Dal 2016 la ho onuro il chantun Grischun cul premi da promoziun per sia lavur culturela. Ils ultims ans ho ella frequento üna scolaziun scu terapeuta/coach da vusch ad Ammersee (D). Actuelmaing es Mayer chantadura e musicista aint il duo ‘MI’AMIA’ cun Sidonia Caviezel. Ella scriva eir istorgias cun musica per iffaunts e chanzuns in tudas-ch, tudas-ch da Bayern ed inglais.

Johannes Knecht deriva da Speyer al Rain. El ho stüdgio scienzas da musica e da litteratura a Saarbrücken scu eir violina, clavazin e diriger a Mannheim ed a Köln.
Sia paschiun per l’opera til ho mno süls palcs a Pforzheim, Coburg e Wuppertal, dal 2001 a la Staatsoper da Stuttgart. Lo ho el lavuro 17 ans scu directur dal cor da la Staatsoper da Stuttgart e furmo significantamaing il cling da quist ensemble singular. Insembel cul cor da la Staatsoper ho el survgnieu numerusas distincziuns naziunelas ed internaziunelas.
Dal 2017 fin al 2020 es Johannes Knecht sto capodirigent dal cor da la renumeda opera da Lyon.
Ingaschis scu giast pussibilteschan al dirigent collavuraziuns culs Rundfunkchors dal SWR, NDR e WDR. Il maestro es regulermaing giast a festivals naziunels ed internaziunels scu per exaimpel a la Festa da prümavaira a Budapest, al Lucerne Festival ubain al festival Osterfestspiele Baden. Johannes Knecht es eir ün expert tschercho per concurrenzas internaziunelas. L’an passo es Johannes Knecht sto ingascho scu dirigent da cor per las producziuns da Carmen e Parsifal a l’opera La Monnaie a Brüssel e per Capriccio da Richard Strauss a l’opera da München. Düraunt la stagiun 2023/24 es el sto directur da cor a la Bayerische Staatssoper a München.
Ultra da que es Knecht daspö il 2003 mneder artistic dal Philharmonia Chor Stuttgart cul quel el cultiva üna collavuraziun regulera cun l’orchester da chombra da Stuttgart, cus filarmonikers da Stuttgart e cun la filarmonia da Württembergica.
Johannes Knecht instruescha scu professer per direcziun da cor a las scoulas otas da musica da Stuttgart e Lübeck, inua ch’el maina eir ls cors da las scoulas otas. El maina classas da master in Svizra ed a l’exteriur.

Sara-Bigna Janett es creschida sü in Engiadin’Ota, ma sias ragischs musicalas ho’la a Tschlin. Cun ses ans nun ho sieu bap pü pudieu frener sieu giavüsch dad imprender a chanter, ed el ho finelmaing cumanzo a guider ad ella ed a sia vusch. Daspö lo ho ella cun grand optimissem e cun bger svung e vöglia (e minchataunt eir main svung e vöglia) perseguito la via da chantadura. Il pü important in sieu chaunt es per Sara-Bigna Janett cha la musicalited nu ceda a la perfecziun. Ella es adüna in tschercha da la dretta balauntscha traunter esser i’l mumaint e fuormer il tun cun absoluta precisiun. Ella do ün’expressiun ed ün cling persunel a bgers differents geners da musica e creescha uschè ün’interpretaziun autentica. La chanzun rumauntscha, saja que populera u chanzun d’art, accumpagna a Sara-Bigna Janett daspö sia naschentscha. Sia chüra e cuntinuaziun la staun fich a cour. La lingua rumauntscha e’l chaunt fuorman üna perfetta simbiosa musicala. Que resta be da sperer cha’l rumauntsch nu vo a verlüüra.

André Fischer ho stüdgio musica a Turich (posauna, musica da scoula e teoria da musica), a Washington D.C. (practicum tar l’orchester naziunel sinfonic) e Prag (cumposiziun) ed es sto l’ultim scolar privat dal dirigent Erich Schmid. Daspö il 1991 instruescha André Fischer teoria da musica a la Scoul’ota d’art a Turich (ZHdK). Quista ho surdo ad el dal 2004 il titel da professer.
Scu successur dad Edmond de Stoutz ho el cumanzo dal 1997 sia lavur scu dirigent dal Zürcher Konzertchor (ZKC), chi l’ho numno dal 2001 mneder artistic dal cor. Ils cuntschaints concerts da Nadel tradiziunels cul Zürcher Kammerorchester (ZKO) i’l Fraumünster sun ils puncts culminants dal cor, daspö il 2019 ho Fischer la direcziun generela dals concerts.
Cul ZKC ho Fischer realiso eir egnas cumposiziuns ‘Mann ist Mann’ (musica da teater seguond il töch da Bertolt Brechts cul istess nom, üna producziun per Zürcher Festspiele 2005) e ‘Musica salutaris’ (UA 2019).

Sidonia Caviezel, naschida 1991, es creschida sü a Martina. Ella ho glivro dal 2015 sieu stüdi da musica a la scoula ota d’art a Turich i’l ram principel accordeon ed i’ls rams laterels clavazin e chaunt da jazz. Zieva ho’la absolt la scoul’ota da pedagogia a Cuira, inua ch’ella ho la sted 2018 s’acquisteda il diplom scu magistra primara. Düraunt sieu temp da stüdi ho ella mno las gruppas da musica da l’associaziun Insieme Cerebral Winterthur scu eir la societed da musica Scuol ed ho instruieu illa scoula da musica Grischun Centrel ed illa scoula da chaunt a Cuira. Daspö avuost 2019 lavura Sidonia Caviezel scu magistra d’accordeon/d’orgelin da maun svizzer e maina cuors fundamentels ed il cor da giuvenils illa scoula da musica Engiadina Bassa/Val Müstair. Sco professiun principela es ella pedagoga curativa illa scoula primara Scuol. Sper differents progets musicals as preschainta ella regulermaing scu solista e part dal duo MI’AMIA. Il cor da giuvenils ‘Cool cor – cul cour’ maina ella fingià daspö tschinch ans.

Curdin Lansel es nat in Engiadina, ho absolt zieva il seminari da magisters il stüdi da musica per scoula I al conservatori a Turich (posauna scu instrumaint principel tar prof. U. Eichenberger, chaunt solistic tar prof. R. Hartmann) ed ho glivro cul predicat ‚Fich bun‘.
Sia abilited da diriger ho Lansel perfecziuno in scolaziuns cun persunaliteds scu Andrés Farkàs, Karl Scheuber, Willi Gohl, Peter Sigwart scu eir in furmaziuns reguleras a Salzburg. Lansel ho mno divers cors ed ho inizio divers progets da musica. Il cor masdo regiunel ‚Cor Proget‘ ho el fundo l’an 1993 ed ho diret 30 ans. El es dirigent da l’Ensemble Filarmonic Engiadina, ün orchester chi preschainta minch’an divers concerts pedagogics illas scoulas. Per sieu lung ingaschamaint a favur dals cors in Engiadina es Lansel gnieu onuro dal 2016 da l’Uniun da chaunt districtuela scu dirigent d’onur. L’Inscunter da chaunt a Zuoz ho Lansel fundo dal 2023.