Rico Valär es creschieu sü a Zuoz ed ho stüdgio linguas neolatinas e rumauntsch a l’Universited da Turich. El es sto traductur tar la Chanzlia federela, mneder d’üna partiziun a l’Uffizi federel da cultura e moderatur tar la Televisiun Rumauntscha. Daspö il 2018 es el professer per litteratura e cultura rumauntscha a l’Universited da Turich. El ho procuro per ediziuns criticas da las ouvras da Peider Lansel, Jon Pult, Cla Biert e Clementina Gilly, realisescha progets da perscrutaziun davart la litteratura rumauntscha e grischuna ed intermediescha cun referats, moderaziuns e recensiuns la litteratura rumauntscha ad ün public vast e pluriling.

Cyrill Schürch es ün cumponist e pianist svizzer chi unescha la musica, la lirica, l’energia e la clerezza ad üna vusch contemporauna caracteristica. Sias ouvras – da tocs per cor ed orchester fin a musica da chombra e pedagogica – sun gnidas preschentedas in tuot l’Europa ed eir sur mer. Il Swiss Festival Orchestra ho suno la prüma rapreschantaziun da sia ouvra briglianta per orchester ‘IMPETUGIUM’ aint il Casino a Zug vendieu our. Cuort zieva ho la Zürcher Sing-Akademie preschanto a la concurrenza internaziunela da cors a Marktoberdorf sia ouvra impreschiunanta ‘The Song of the Star’.
Sias ouvras publichedas tar EMR (Svizra), tar la chesa editura Carus (Germania), tar la chesa editura Helbling e tar AVA-Editions sun gnidas premiedas suvenz per lur qualited artischauna e per lur expressivited.
Cyrill Schürch ho promovieu in cumposiziun al King’s College London ed ho eir ragiunt diploms da bachelor e da master (BM, MM) taunt in cumposiziun scu eir in clavazin a la Moores School of Music da l’University of Houston. Actuelmaing cumpona el diversas ouvras in incumbenza dad ensembles e cors da la Svizra e da l’exteriur.

Manfred Koch es naschieu dal 1955 a Stuttgart, ho stüdgio filosofia, germanistica ed istorgia a Tübingen. Dal 1987 ho el promovieu cun üna lavur davart Hofmannsthal e Rilke, dal 2001 ho el ragiunt l’abilitaziun davart la noziun ‘litteratura mundiala’ da Goethe. Fin dal 2021 es sto Koch professer per istorgia da litteratura tudas-cha a l’Universited da Basilea. Passa vainch ans ho lavuro Manfred Koch scu collavuratur liber dal feuilleton da la NZZ e scu autur dad essais da radio per il Südwestrundfunk Baden-Baden. Insembel cun sia duonna Angelika Overath maina el üna scoula per scriver creativ a Sent, inua ch’el viva daspö il 2007.

Albert Frey, naschieu a Mindelheim, s’ho scolo a la scoul’ota da musica dad Augsburg (l’anteriur Conservatori da Leopold Mozart). Uriundamaing ho el stüdgio cornist da concert e glivro culs examens. Zieva ho el cuntinuo cun stüdis da musica sacrala. Seis professurs d’eiran traunter oter prof. Karl Maureen (orgel) e Jack Meredith (corn). Dal 1991 ho el survgnieu la plazza scu musicist a la baselgia parochiala St. Mang a Füssen. Lo es el sto respunsabel per tuot la musica sacrala illa liturgia e pels programs da concert. Sül champ artistic s’ho el profilo sper sieus concerts d’orgel, cul corn, ma eir scu cuntertenor. A partir dal 1992 es Frey sto ingascho scu magister d’orgel, da corn, da chaunt e direcziun da cor a la scoula da musica da Reutte. Daspö il 2015 instruescha Frey al conservatori da Puntina/Innsbruck scu professer per furmaziun da vusch. Ün accent in sia lavur al conservatori a Puntina es l’instrucziun vocala cul cuntschaint cor da mats, ‘Wiltener Sängerknaben’.

Laura Wallnöfer es creschida sü per granda part a Bever (CH). Zieva absolt il seminari da magistra a Cuira (1999 – 2004) supiglia ella dal 2004 üna plazza scu magistra illa scoula a Segl, daspö il 2016 eir auncha la funcziun da mnedra. Wallnöfer ho üna granda paschiun per chanter e passainta eir bgeras uras improvisand al clavazin. A Segl ho la magistra fundo il COR VIVA (2007), ün ensemble cun vuschs masdedas dad homens e duonnas ed ün an zieva las VIVA VOICE (2008), ün ensemble da duonnas. La magistra fo eir gugent sport aint il liber, passlung, ir in muntagna. La dirigenta es marideda, ho duos iffaunts da 14 ed 11 ans chi chauntan eir gugent.

Dr. Barbara Studer, neuroscienzieda, es confundatura e CEO da Hirncaoch SA.
La neuroscienzeda promovida lavura illa perscrutaziun, ill’instrucziun ed illa pratcha. Zieva avair s-chaffieu e mno ün post specialiso a l’Universited da Berna ho ella fundo il Spin-off-coach dal tscharvè, cun il quêl ella e sieu team spordschan programs cumplessivs per la fitness mentela e la sandet per giuvenils fin persunas pü attempedas. Ella es marideda, mamma da trais iffaunts ed es eir d’inscuntrer scu referenta e musicista.

Clara Sattler, oriunda dal Tirol dal Süd (I), ho absolt sieu stüdis da chaunt per chanzun, oratori ed opera a Bulsaun ed a Vienna. Ultra da que ho ella absolt furmaziuns da maister tar Maria Venuti, Ann Monoyos, Kurt Widmer e Helga Müller Molinari.
L’experta per furmaziun da vusch es fich dumandeda. Ella pratichescha üna viva activited da concerts in Italia, in Svizra ed a l’exteriur. Sieu repertori taundscha dal chaunt baroc fin al chaunt modern.
Ella as ho preschenteda già in grandas chesa da concerts, aint il chastè da Schönbrunn a Vienna, i’l Stephaniensaal a Graz, a Grein al Danubi (operas dal baroc), in Pologna (Carmina Burana), a Mostar e Sarajevo, aint il Dom da Milaun, a Salzburg Lodi ed a Roma. Cul cor viril ‘Götzis’ ho ella mno dal 2008 üna turnea tres l’Africa dal Süd, dal 2014 in America dal Süd. Scu commembra da l’ensemble d’operettas dal Tirol dal Süd ho ella chanto la princessa i’l ‘Vogelhändler’, Laura i’l ‘Bettelstudent’, Rosalinde illa ‘Fledermaus’, Hanna Glawari illa ‘Lustige Witwe’ e la contessa Mariza.
Actuelmaing instruescha Clara Sattler a la scoula da musica da l’Engiadin’Ota. Ella dirigia il cor viril ‘Brummnet’, il cor da mattas ‘Vinzentiner’ ed il Cor masdo da Zuoz.

Gernot Niederfriniger (nat dal 1974) es magister da musica, referent, dirigent da cors, cumponist, musicist da baselgia e musicant. Daspö la scolaziun al conservatori tirolais ad Innsbruck i‘ls rams zitra e flöta da lain cun qualificaziun d’instruir dal 1995 instruescha el a la scoula da musica Vnuost Sura, es mneder dal ‚Vinschger Chor‘ e commember in diversas gruppas da musica populera. El lavura scu referent e mneder tar seminaris da musica populera e presidiescha daspö il 2014 l’uniun da musica populera dal Tirol dal Süd.

Fingià düraunt si’infanzia ho Nina Mayer chanto aint il cor d’iffaunts ad Oberau/Garmisch-Partenkirchen (D). A partir da quatter ans ho ella giodieu las prümas uras da violina, cun tschinch ans es gnida tiers la flöta da lain e cun set ans ho ella survgnieu instrucziun da clavazin. Ella es steda commembra da l’orchester d’iffaunts da Werdenfelser ed ho frequento il gimnasi benedictin Ettal (D). Scu matta giuvna chantaiva ella i’l cor, sunaiva aint il orchester, eir aint il orchester da flötas. Zieva as ho ella preschanteda scu chantadura in üna Big Band. Cun 14 ans ho ella fundo la band Tubestar, lo as ho ella preschanteda scu chantadura e violinista. Insembel cun sieus amihs da la band haun els scrit egnas chanzuns, els haun do bgers concerts. L’an 2001 ho Tubestar survgnieu il premi da l’Abat Placi per l’ingaschamaint culturel. Nina Mayer ho piglio inavaunt instrucziun da chaunt da jazz e pop, pü tard eir da bratscha. A segua ün stüdi privat da chaunt tar la chantadura Helena Jungwirth da Planegg/München (D). Ella es gnida tschernida scu magistra da violina e clavazin in l’internat Ettal. Lura as ho ella decisa da fer il stüdi scu magistra da musica al gimnasi a la Scol’ota da musica e teater a München (ram principel clavazin, ram laterel violina, ram d’accent chaunt). Dal 2005 es Nina Mayer gnida a ster in Svizra. A Ramosch lavura ella hoz scu magistra privata da chaunt, clavazin e violina. I’l cor da vschinauncha ho ella chanto divers ans. Zieva ho ella surpiglio la bachetta dal cor masdo da Ramosch. Daspö il 2006 instruescha ella scu magistra da chaunt a la scoula da musica Engiadina Bassa/Val Müstair. Cumpuoner egnas chanzuns rumauntschas e chanzuns per iffaunts tuocha tar sias lavuors predilettas. Daspö il 2014 maina ella cors d’iffaunts e da giuvenils in Engiadina Bassa. Dal 2016 la ho onuro il chantun Grischun cul premi da promoziun per sia lavur culturela. Ils ultims ans ho ella frequento üna scolaziun scu terapeuta/coach da vusch ad Ammersee (D). Actuelmaing es Mayer chantadura e musicista aint il duo ‘MI’AMIA’ cun Sidonia Caviezel. Ella scriva eir istorgias cun musica per iffaunts e chanzuns in tudas-ch, tudas-ch da Bayern ed inglais.

Johannes Knecht deriva da Speyer al Rain. El ho stüdgio scienzas da musica e da litteratura a Saarbrücken scu eir violina, clavazin e diriger a Mannheim ed a Köln. Sia paschiun per l’opera til ho mno – zieva diversas staziuns scu Kapellmeister süls palcs a Pforzheim, Coburg e Wuppertal – dal 2001 al Staatstheater Stuttgart. Lo ho el lavuro 17 ans scu directur dal cor da la Staatsoper da Stuttgart ed ho furmo significantamaing il cling da quist ensemble singular. Insembel cul cor da la Staatsoper ho el survgnieu numerusas distincziuns naziunelas ed internaziunelas.

Dal 2017 fin al 2020 es sto Johannes Knecht Chef du Choeur a la renumneda Opéra de Lyon. Ingaschamaints scu giast collian al dirigent cul Rundfunkchor dal SWR, NDR e WDR. Il maestro es regulermaing giast a festivals naziunels ed internaziunels scu per exaimpel al Festival da prümavaira a Budapest, al Lucerne Festival, a l‘Osterfestspiele Baden-Baden u lura al nouv Ja, Mai Festival a München.

Dal 2022 es sto Johannes Knecht ingascho scu directur da cor per las producziuns da Carmen e Parsifal (direcziun musicala: Alain Altinoglu) a l’opera La Monnaie a Brüssel e per Capriccio da Richard Strauss al Münchner Osterfestspiele. Dal 2023 ho el surpiglio üna substituziun pel directur da cor da la Staatssoper a München ed es sto respunsabel traunter oter per la producziun nouva da l’Aida da Giuseppe Verdi. In october 2023 ho Johannes Knecht elavuro cul Staatsopernchor München l‘8avla sinfonia da Gustav Mahler suot la bachetta da Kirill Petrenko. Düraunt la stagiun 2024/25 d’eira Johannes Knecht ingascho a l’opera da Turich per la producziun nouva da l’opera Das Leben mit einem Idioten dad Alfred Schnittke.

Fingià daspö il 2003 es Johannes Knecht mneder artistic dal Philharmonia Chor Stuttgart cul quel el cultiva üna collavuraziun regulera cul Stuttgarter Kammerorchester, culs Stuttgarter Philharmoniker e culla Württembergische Philharmonie Reutlingen.

Johannes Knecht instruescha scu professer per direcziun da cor a las scoulas otas da musica a Stuttgart e Lübeck, inua ch’el maina eir ils cors da quistas scoulas otas. El maina classas da master in Germania ed a l’exteriur, scu güst in mai 2025 a Tiflis.