The Sam Singers as nomna la top furmaziun svizra da Close Harmony chi’s dedichescha a melodias sentimentelas, ritmica viva e schlaghers inschmanchabels da la prüma mited dal 20evel tschientiner. Close Harmony, que es il möd particuler dals arrandschamaints cullas vuschs mnedas da möd fich stret ed intim chi prodüa ün sound vocal dutschin cun armonias da jazz. Ils Sam Singers vaun daspö bgers ans zieva ils stizis originels dals vegls hits ed ans surprendan in prüma lingia causa l’intunaziun excellenta. Lur sound precis e chod lascha reviver l’ambiaint da temps passos. Cha que sajan ils semperverds da Manhattan Transfer, Chordettes, King Sisters, Andrews Sisters, dals fradgliuns Schmid ubain da la gruppa tudas-cha Comedian Harmonists; la gruppa vocala a quatter vuschs commouva seis public cun ün‘autenticited impreschiunanta.

Las shows moderedas inricheschan ils Sam Singers cun da tuotta sorts anecdotas divertentas davart lur musica, cun coreografias e cun outfits adattos.
Sper lur concerts, shows illa televisiun ed a festivals – traunter oter accumpagnedas da la Big Band da Pepe Lienhard, da la Big Band Atlantis, da l’Argovia Philharmonic u da la Celebration Pop Orchestra i‘l KKL – chauntan ils Sam Singers in lur furmaziun combo eir adüna darcho per occurrenzas privatas u per firmas.

Al program existent Holiday in Switzerland (schlaghers da Caterina Valente, Vico Torriani, Paola, eop.) ed al program da Nadel annuel Swing Xmas accumpagnan il program da giubileum Come fly with me e la nouva show nostalgia Sentimental Journey. Cul nouv program s’avicinan ils Sam Singers a nos temp e faun dapü musica dals ans 50. Eir cò s’orienteschan els als originels immortels dal cuolmen da la musica da divertimaint. Titels scu Mr. Sandman, Take the A-train, Straighten up and fly right, Quizas, quizas, arrandschamants da hits da Doris Days, scu‘l No.1 Sentimental Journey. Tar la mixtura tipica pels Sam Singers da tituls tudas-chs, svizzers ed americauns vegnan tiers per l’Inscunter da chaunt a Zuoz eir ün u l’oter titel da l’America dal Süd. Neir quists ritems da jazz e’ls sounds nostalgics nu laschan pos als chaluns.

Ils Sam Singers sun: Catriona Bühler, voc / Julia Schiwowa, voc / Noelle Bobst, voc /
Samuel Zünd, voc, capobanda, arrandschör e pianist / Fridolin Blumer, contrabass

Cumünaivelmaing in cling unieu ed in armonia fin a la bravüra! Que es il credo da l’ensemble vocal Consonus, ün cor surregiunel chi’s cumpuona da giuvnas chantaduras e chantadurs versos e chi ho lur domicil in Grischun. Mauro Ursprung, il giuven musicist, dirigia il cor. Il böt principel da l’ensemble es da surmner al public, cun lur evenimaint da cling, in nouvs muonds sonors e da creer ün’experienza da concert inschmanchabla!
Sper ils egens concerts as participescha l’ensemble regulermaing eir a concurrenzas da cor. Divers success ho il cor già pudieu festager in Svizra ed a l’exteriur (traunter oter victur da la concurrenza svizra da cors 2024 illa categoria cors d’elita, 2 medaglias d’or al World Choir Games 2024 ad Auckland/NZ, viedi da concert in Nova Zelanda, victur a la 59evla concurrenza internaziunela da cors 2025 a Spittal a la Drau in Austria).

Mauro Ursprung, dirigent
Bgers ans commember dal cor da la scoula chantunela a Cuira e pü tard scu chantadur da l’ensemble vocal incantanti ho Mauro Ursprung sviluppo ün grand entusiassem per la musica, impustüt per suner il clavazin e pel chaunt da cor.
Cun 14 ans ho el – zieva quatter ans instrucziun da battaria – cumanzo cun l’instrucziun da clavazin tar Urban Derungs e pü tard eir tar Roman Cantieni a la Scoula da musica da Cuira. A seguan stüdis da musica a la scoul’ota da Lucerna i’ls rams teoria da musica, clavazin tar Yvonne Lang e Marc Hunziker e direcziun da cor tar Ulrike Grosch.
Düraunt la stagiun 2016 es el sto ingascho scu assistent dals duos dirigents Nicolas Fink e Philippe Savoy tar il cor svizzer da giuvenils.
Mauro Ursprung es fundatur e dirigent da l’ensemble vocal ch’el ho mno da prüma davent cun bger entusiassem e granda paschiun a divers success.

Il cor d’iffaunts ‘Cor Kids’ es ün ensemble da la Scoula da musica Engiadina Bassa/Val Müstair. Daspö la fundaziun aunz tschinch ans dirigia Nina Meyer quist giuven ensemble. Ils iffaunts sun traunter 9 e 11 ans ed exerciteschan üna vouta l’eivna.

Ils VIVA VOICE sun och giuvnas duonnas da Segl, chi’s chattan regulermaing daspö l’an 2008 per chanter insembel. Ils VIVA VOICE sun och giuvnas duonnas da Segl, chi’s chattan regulermaing daspö l’an 2008 per chanter insembel. Duos dad ellas haun piglio cun se las sours a chanter ed uschè as ho cul temp furmo quist ensemble, chi ho fingià pudieu chanter a diversas nozzas ed otras occurrenzas. Ellas faun eir adüna part dal concert da Nadel dal COR VIVA a Segl.
Bgers ans d’eira que difficil da fer regulermaing prouvas, cun que cha la granda part da las giuvnas d’eira giò la bassa per il giarsunedi u la lavur. Uschè as vaiva da’s concentrer sün ün pêr pochas prouvas cuort aunz las rapreschantaziuns. Listess haun tuottas tgnieu vi da l’ensemble, uschè ch’el viva hoz auncha!

Il ‚Vinschger Chor‘ exista daspö il 1980 e quinta passa 30 chantaduras e chantaduors da püs lös dal Vnuost i‘l Tirol dal Süd. Il repertori dal cor cumpiglia la chanzun populera scu eir litteratura sacrala e profana. Il ‚Vinschger Chor‘ ho piglio part cun success a diversas concurrenzas da chaunt e s’ho ingascho specielmain per la chüra e derasaziun da la chanzun populera genuina i‘l Vnuost ma eir sur ils cunfins our. Il cor vain presidio da Ruth Fabi e diret da Gernot Niederfriniger.

Il cor da giuvenils ‘Cool cor – cul cour’ es ün ensemble da la Scoula da musica Engiadina Bassa/Val Müstair. Il cor es gnieu fundo aunz tschinch ans, cò chauntan giuvenils traunter 12 e 16 ans. Sidonia Caviezel maina la gruppa da prüma davent.