Sara-Bigna Janett
Sara-Bigna Janett es creschida sü in Engiadin’Ota, ma sias ragischs musicalas ho’la a Tschlin. Cun ses ans nun ho sieu bap pü pudieu frener sieu giavüsch dad imprender a chanter, ed el ho finelmaing cumanzo a guider ad ella ed a sia vusch. Daspö lo ho ella cun grand optimissem e cun bger svung e vöglia (e minchataunt eir main svung e vöglia) perseguito la via da chantadura.
Il pü important in sieu chaunt es per Sara-Bigna Janett cha la musicalited nu ceda a la perfecziun. Ella es adüna in tschercha da la dretta balauntscha traunter esser i’l mumaint e fuormer il tun cun absoluta precisiun. Ella do ün’expressiun ed ün cling persunel a bgers differents geners da musica e creescha uschè ün’interpretaziun autentica.
La chanzun rumauntscha, saja que populera u chanzun d’art, accumpagna a Sara-Bigna Janett daspö sia naschentscha. Sia chüra e cuntinuaziun la staun fich a cour. La lingua rumauntscha e’l chaunt fuorman üna perfetta simbiosa musicala. Que resta be da sperer cha’l rumauntsch nu vo a verlüüra.
A chaschun da l’Inscunter da chaunt a Zuoz do Sara-Bigna Janett instrucziun da chaunt, singul ubain in ensemble e furmaziun da vusch.
Quista spüerta ho lö in venderdi, ils 25 settember da las 16.00-19.00 ed in sanda, ils 26 settember 2026 da las 10.00-16.15 illa scoula primara da Zuoz. Ün’annunzcha es in mincha cas necessaria. L’instrucziun da chaunt, resp. la furmaziun da vusch es per minchün gratuita.