Ramona Zueck

Ramona Zueck es oriunda da Laas i’l Tirol dal Süd e lavura scu sopranista e pedagoga da chaunt. Ella ho stüdgio scienza da musica a l’Universited Leopold-Franzens a Puntina e parallelmaing chaunt al conservatori Claudio Monteverdi a Bulsaun. Lo ho ella approfundieu sia scolaziun artistica in chanzun ed oratori tar Sabina von Walther, quist ho ella glivro cun distincziun. In seguit ho ella cuntinuo sieus stüdis a la Scoul’ota da musica da Basilea, inua ch’ella ho fat il master in pedagogia da musica cul ram principel chaunt tar Marcel Boone ed ho eir cò glivro sieu diplom cun distincziun. Impuls artistics ho ella survgnieu impü in cuors da maister tar Juliane Banse, Anne Sofie von Otter, Fenna Kügel-Seifried ed Alessandro Corbelli.
Sieu accent artistic es i’lla sparta da chanzuns e concerts. Tar sieus cuolmens da fin uossa quintan la rapreschantaziun da Strauss Vier letzten Lieder illa baselgia da San Martin a Basilea, il proget Lenz- und Liebeslieder a Basilea ed a Mannheim scu eir contribuziuns in producziuns d’operas scu Die Zauberflöte da Mozart ed Ein Sommernachtstraum da Mendelssohn. Ultra da que es ella da vzair regulermaing scu solista tar arrandschamaints sacrels e concertants, scu eir scu sopranista in cors professiunels in l’intschess tudas-ch.
In sia lavur pedagogica inclegia Ramona Zueck la furmaziun da la vusch scu process individuel e cumplessiv. I’l center sto per ella la scuvierta e’l svilup da l’egna vusch persunela cun sias pussibiliteds sonoras. Cò cumbina ella lavur vocala fundeda cun percepziun dal corp, creaziun musicala ed ün ir intuorn consciaint cun text ed expressiun. Impustüt important es per ella ün’atmosfera da lavur cun fiduzcha chi spordscha spazi per pruver our, scuvrir e svilupper nouvas fatschettas. Sieu böt es da güder a chantaduras e chantadurs a chatter ün möd saun e sgür cun lur vusch e da promouver il plaschair da chanter e da fer musica insembel.

Program