Johannes Knecht
Johannes Knecht deriva da Speyer al Rain. El ho stüdgio scienzas da musica e da litteratura a Saarbrücken scu eir violina, clavazin e diriger a Mannheim ed a Köln.
Sia paschiun per l’opera til ho mno süls palcs a Pforzheim, Coburg e Wuppertal, dal 2001 a la Staatsoper da Stuttgart. Lo ho el lavuro 17 ans scu directur dal cor da la Staatsoper da Stuttgart e furmo significantamaing il cling da quist ensemble singular. Insembel cul cor da la Staatsoper ho el survgnieu numerusas distincziuns naziunelas ed internaziunelas.
Dal 2017 fin al 2020 es Johannes Knecht sto capodirigent dal cor da la renumeda opera da Lyon.
Ingaschis scu giast pussibilteschan al dirigent collavuraziuns culs Rundfunkchors dal SWR, NDR e WDR. Il maestro es regulermaing giast a festivals naziunels ed internaziunels scu per exaimpel a la Festa da prümavaira a Budapest, al Lucerne Festival ubain al festival Osterfestspiele Baden. Johannes Knecht es eir ün expert tschercho per concurrenzas internaziunelas. L’an passo es Johannes Knecht sto ingascho scu dirigent da cor per las producziuns da Carmen e Parsifal a l’opera La Monnaie a Brüssel e per Capriccio da Richard Strauss a l’opera da München. Düraunt la stagiun 2023/24 es el sto directur da cor a la Bayerische Staatssoper a München.
Ultra da que es Knecht daspö il 2003 mneder artistic dal Philharmonia Chor Stuttgart cul quel el cultiva üna collavuraziun regulera cun l’orchester da chombra da Stuttgart, cus filarmonikers da Stuttgart e cun la filarmonia da Württembergica.
Johannes Knecht instruescha scu professer per direcziun da cor a las scoulas otas da musica da Stuttgart e Lübeck, inua ch’el maina eir ls cors da las scoulas otas. El maina classas da master in Svizra ed a l’exteriur.
In occasiun da l’Inscunter da chaunt a Zuoz 2024 elavura Johannes Knecht insembel cul cor ad hoc üna schelta da chanzuns, que in üna prouva da chaunt publica. Las seguaintas dumandas vegnan tematisedas: Cu lavura il maister-dirigent cul cor? Che fo ün dirigent da cor da prüma classa oter cu nus dirigents/-as da cor? Cu elavura el ün cling net, e che exercizis e cussagls do el per la furmaziun da vusch i‘l cor? Che racumanda el per l’interpretaziun da l’ouvra? In ün lavuratori da diriger paun dirigentas e dirigents perfecziuner lur abiliteds da diriger suot quista direcziun cumpetenta.
L’occurrenza ho lö in sanda, ils 14 settember 2024, da las 14.00-16.30 illa baselgia San Luzi a Zuoz. Per chanter cul cor ad hoc nu cuosta que ünguotta, ad es però necessari da s’annunzcher e dad esser preparo bain. Pel public es l’entreda libra.
Zieva ün apero da ca 1h:
Las chanzuns güst exercitedas illa prouva publica vegnan preschantedas al public. Differents partecipaunts surpiglian la bachetta. Il local da concert vain transfurmo in ün spazi per experimaints. Cun as pusiziuner in differents lös in baselgia vain pruvo inua cha’l cor clingia il meglder. Cu vegnan plazzos ils singuls chantaduors dal cor? Opiniuns dal dirigent, da las chantaduras e dals chantaduors e dal public vegnan partidas e discusas.
La producziun ho lö in sanda, ils 14 settember 2024, da las 17.30-19.00 illa baselgia San Luzi a Zuoz. Per chanter cul cor ad hoc nu cuosta que ünguotta, que es però necessari da s’annunzcher e dad esser preparo bain. Pel public es l’entreda libra.