Johannes Knecht
Johannes Knecht deriva da Speyer al Rain. El ho stüdgio scienzas da musica e da litteratura a Saarbrücken scu eir violina, clavazin e diriger a Mannheim ed a Köln. Sia paschiun per l’opera til ho mno – zieva diversas staziuns scu Kapellmeister süls palcs a Pforzheim, Coburg e Wuppertal – dal 2001 al Staatstheater Stuttgart. Lo ho el lavuro 17 ans scu directur dal cor da la Staatsoper da Stuttgart ed ho furmo significantamaing il cling da quist ensemble singular. Insembel cul cor da la Staatsoper ho el survgnieu numerusas distincziuns naziunelas ed internaziunelas.
Dal 2017 fin al 2020 es sto Johannes Knecht Chef du Choeur a la renumneda Opéra de Lyon. Ingaschamaints scu giast collian al dirigent cul Rundfunkchor dal SWR, NDR e WDR. Il maestro es regulermaing giast a festivals naziunels ed internaziunels scu per exaimpel al Festival da prümavaira a Budapest, al Lucerne Festival, a l‘Osterfestspiele Baden-Baden u lura al nouv Ja, Mai Festival a München.
Dal 2022 es sto Johannes Knecht ingascho scu directur da cor per las producziuns da Carmen e Parsifal (direcziun musicala: Alain Altinoglu) a l’opera La Monnaie a Brüssel e per Capriccio da Richard Strauss al Münchner Osterfestspiele. Dal 2023 ho el surpiglio üna substituziun pel directur da cor da la Staatssoper a München ed es sto respunsabel traunter oter per la producziun nouva da l’Aida da Giuseppe Verdi. In october 2023 ho Johannes Knecht elavuro cul Staatsopernchor München l‘8avla sinfonia da Gustav Mahler suot la bachetta da Kirill Petrenko. Düraunt la stagiun 2024/25 d’eira Johannes Knecht ingascho a l’opera da Turich per la producziun nouva da l’opera Das Leben mit einem Idioten dad Alfred Schnittke.
Fingià daspö il 2003 es Johannes Knecht mneder artistic dal Philharmonia Chor Stuttgart cul quel el cultiva üna collavuraziun regulera cul Stuttgarter Kammerorchester, culs Stuttgarter Philharmoniker e culla Württembergische Philharmonie Reutlingen.
Johannes Knecht instruescha scu professer per direcziun da cor a las scoulas otas da musica a Stuttgart e Lübeck, inua ch’el maina eir ils cors da quistas scoulas otas. El maina classas da master in Germania ed a l’exteriur, scu güst in mai 2025 a Tiflis.
In occasiun da l’Inscunter da chaunt a Zuoz 2026 elavura Johannes Knecht cul cor ad hoc qualche ouvras per cor masdo i‘l ram d’üna prouva publica. Dumandas davart la purteda da la lingua illa musica, prima la musica – dopo la parola, u viceversa sun cò i’l center.
L’occurrenza ho lö in sanda, ils 26 settember 2026 da las 10.00-16.15 (cun posas) illa baselgia San Luzi a Zuoz. Per chanter i’l cor ad hoc es que necessari da s’annunzcher. Per las chantaduras ed ils chantadurs dal cor es la partecipaziun gratuita. Pel public es l’entreda a la prouva publica eir gratuita
zieva l‘apero:
Las ouvras güst exercitedas vegnan uossa rapreschantedas. I’l center sto la musica e la lingua. Il cumponist Cyrill Schürch ed il dirigent Johannes Knecht discutan davart il tema musica e la lingua cun involver al cor ed al public.
L’occurrenza ho lö in sanda, ils 26 settember 2026 da las 17.00 – 18.30 illa baselgia San Luzi a Zuoz. Ad es necessari da s’annunzcher per chanter cul cor ad hoc. Per las chantaduras ed ils chantadurs dal cor ad hoc es la partecipaziun gratuita. L’entreda pel public al concert es eir libra.