Clara Sattler
Clara Sattler, oriunda dal Tirol dal Süd (I), ho absolt sieu stüdis da chaunt per chanzun, oratori ed opera a Bulsaun ed a Vienna. Ultra da que ho ella absolt furmaziuns da maister tar Maria Venuti, Ann Monoyos, Kurt Widmer e Helga Müller Molinari.
L’experta per furmaziun da vusch es fich dumandeda. Ella pratichescha üna viva activited da concerts in Italia, in Svizra ed a l’exteriur. Sieu repertori taundscha dal chaunt baroc fin al chaunt modern.
Ella as ho preschenteda già in grandas chesa da concerts, aint il chastè da Schönbrunn a Vienna, i’l Stephaniensaal a Graz, a Grein al Danubi (operas dal baroc), in Pologna (Carmina Burana), a Mostar e Sarajevo, aint il Dom da Milaun, a Salzburg Lodi ed a Roma. Cul cor viril ‘Götzis’ ho ella mno dal 2008 üna turnea tres l’Africa dal Süd, dal 2014 in America dal Süd. Scu commembra da l’ensemble d’operettas dal Tirol dal Süd ho ella chanto la princessa i’l ‘Vogelhändler’, Laura i’l ‘Bettelstudent’, Rosalinde illa ‘Fledermaus’, Hanna Glawari illa ‘Lustige Witwe’ e la contessa Mariza.
Actuelmaing instruescha Clara Sattler a la scoula da musica da l’Engiadin’Ota. Ella dirigia il cor viril ‘Brummnet’, il cor da mattas ‘Vinzentiner’ ed il Cor masdo da Zuoz.
A chaschun da l’Inscunter da chaunt a Zuoz do Clara Sattler instrucziun da chaunt, singul ubain in ensemble e furmaziun da vusch.
Quista spüerta ho lö in sanda, ils 14 settember da las 09.00-14.00 e dumengia, ils 15 settember 2024 da las 9.00-12.00 illa scoula primara da Zuoz. Ün’annunzcha es in mincha cas necessaria, l’instrucziun da chaunt e la furmaziun da vusch sun gratuitas per grand e pitschen.