André Fischer
André Fischer ho stüdgio musica a Turich (posauna, musica da scoula e teoria da musica), a Washington D.C. (practicum tar l’orchester naziunel sinfonic) e Prag (cumposiziun) ed es sto l’ultim scolar privat dal dirigent Erich Schmid. Daspö il 1991 instruescha André Fischer teoria da musica a la Scoul’ota d’art a Turich (ZHdK). Quista ho surdo ad el dal 2004 il titel da professer.
Scu successur dad Edmond de Stoutz ho el cumanzo dal 1997 sia lavur scu dirigent dal Zürcher Konzertchor (ZKC), chi l’ho numno dal 2001 mneder artistic dal cor. Ils cuntschaints concerts da Nadel tradiziunels cul Zürcher Kammerorchester (ZKO) i’l Fraumünster sun ils puncts culminants dal cor, daspö il 2019 ho Fischer la direcziun generela dals concerts.
Cul ZKC ho Fischer realiso eir egnas cumposiziuns ‘Mann ist Mann’ (musica da teater seguond il töch da Bertolt Brechts cul istess nom, üna producziun per Zürcher Festspiele 2005) e ‘Musica salutaris’ (UA 2019).
A chaschun da l’Inscunter da chaunt a Zuoz 2024 preschainta ed explicha André Fischer sia ouvra contemporauna da cor ‘Musica salutaris’ e vain in discuors cul public: Cu nascha ün’ouvra da cor moderna? Che instrumaints ed üsaglias drouva hoz ün cumponist per sia lavur? Che rolla giouvan las pussibilteds tecnicas e ChatGPT per üna cumposiziun contemporauna? Che sun las sfidas per nouvas cumposiziuns da cor?
L’occurrenza ho lö in sanda, ils 14 settember 2024 da las 09.30-11.00 illa baselgia da San Luzi a Zuoz. A nun es necessari da s’annunzcher, entreda libra.