L’ideja

Mincha duos ans, adüna la fin da settember, haun lö i’l stupend bel minz da la vschinauncha, l’Inscunter da chaunt a Zuoz. Alternand cul Festival da teater Travers, chi vain eir realiso mincha duos ans a Zuoz, figüran sün quist program concerts, preschantaziuns, exposiziuns, discussiuns, excursiuns e lavuratoris. Involvedas vegnan furmaziuns vocalas da tuot gener, giasts e referents da la regiun, ma eir specialists d’utrò, que chi renda a l’inscunter ün caracter internaziunel. Ün’attenziun speciela survain la chüra e la promoziun dal chaunt. Chantaduras e chantadurs, dirigentas e dirigents survegnan nouvs impuls per la lavur musicala. Il program dess però eir esser interessant per noss giasts chi faun gugent vacanzas activas e culturelas in Engiadina. La seguond’ediziun da l’Inscunter da chaunt a Zuoz vain realiseda dals 25-27settember 2026.

• Vessast plaschair da piglier üna lecziun da chaunt, sulet/-ta ubain in ensemble, tar üna chantadura / ün chantadur professiunel? Vessast gugent lascho controller il cling u la funcziun da tia vusch?
• Voust chanter cul cor ad hoc suot la bachetta dad ün maisterdirigent internaziunel?
• Lessast dafatta tü surtour la bachetta e survgnir ün resun dal maestro?
• Lessast simplamaing cumanzer il di cun chanter?
• At do que da buonder cu ch‘üna cumponista/ün cumponist tscherna il text per sia cumposiziun? Prima la musica, dopo la parola – ubain tuottüna viceversa?
• Lessast tü tadler che cha scienzios da litteratura, chantadurs/-as e dirigents/-as dischan davart l’importanza da la musica e da la lingua in cumposiziuns?
• U lessast simplamaing be tadler que chi capita la fin d’eivna a Zuoz?

A l’Inscunter da chaunt a Zuoz dals 25-27 settember 2026 sun invidedas tuot las persunas chi s’interessan pel chaunt e chi vöglian as perfecziuner i’l chaunt, dimena minchüna e minchün. La partecipaziun activa e passiva es gratuita. Nossa maxima es: Access gratuit per minchün/-a a la furmaziun musicala. Per singulas activiteds fo que dabsögn da s’annunzcher, vair suot program.

Nus ans allegrains da’T pudair bivgnanter in settember 2026 a Zuoz.

Zuoz – la vschinauncha da l‘inscunter

Zuoz es situo sün 1’750 m.s.m., innombra 1’320 abitantas ed abitants ed es ün lö chi spordscha relaziuns ideelas per l’inscunter – üna vschnauncha cun granda tradiziun e cultura rumauntscha, malgrô ils numerus giasts e l’internaziunalited, üna vschinauncha cumpacta cun buna infrastructura ed ün bel ambiaint.

https://www.zuoz.ch/

Davart la baselgia San Luzi, inua chi haun lö las producziuns, as po s’infurmer cò.